TACLOBAN CITY – Nakatalaan nga mag-abre an Leyte Regional Prison han pinakasiyahan hini nga senior high school program para mga preso yana nga tiarabot nga Hunyo 4.
Ini in pinaagi han inisyatibo han Department of Education Leyte Division ngan han suporta han Leyte 3rd Congressional District kun diin maabot ha 63 nga mga inmates an makakabenepisyo ha mao nga programa.
An mao gihapon nga mga preso in nakapasar han Accreditation and Equivalency Program han Alternative Learning System (ALS) ha sakob han penal colony.
Maaabot ha P26.7 million naman an gin-alutaga para han konstruksyon han unom nga classroom han duha kaandana nga building, usa nga gymnasium, library ngan computer laboratory para ha magiging estudyante hini nga preso.
An klase ha sakob han presuhan in magiging usa nga special class han Hampipila National High School ha Abuyofg, Leyte ngan ini in pagdudumaraon tikang alas otso hit aga tubtob alas singko hit kulop tikang Lunes tubtob Biyernes.
