Suportado daw han mayorya han Senado an paningkamot ni Senate Finance Committee Chairperson JV Ejercito nga tanggalon ha panukala nga 2027 national budget an mga kwestyunable ngan posible nga pagtikangan han korapsyon nga alokasyon, sumala kan Sen. Panfilo “Ping” Lacson.
Ha pahayag ni Lacson, ginmalatumat niya nga nagkakaurusa an mga senador ha panginano ha panukala nga budget agud masigurado nga matatanggal an mga alokasyon nga waray sakto nga basaranan ngan posible nga magamit ha korapsyon.
Sumala pa kan Lacson, dire la an pagtanggal ha mga kwestyunable nga alokasyon an panuyo han panginano kundi an pagsisigurado gihapon han transparensiya ha bug-os nga proseso han pagbug-os han nasyunal nga budget.
Gintagan-duon hini nga waray angay magin eksepsyon ha panginano ha mga gastuson han gobyerno.
“All means all,” duon han senador, nga nagpapasabot nga ngatanan han kaduha-duda nga alokasyon in kinahanglan mapanginano anuman an gintikangan o kun hin-o an posible nga makatagamtam hini.
Syahan na gihapon nga ginmalatumat ni Lacson nga waray dapat palagpason an Senado ha pagtadong ha mga kwestyunable nga alokasyon ha bersyon han panukala nga budget nga iginpasa han Kamara de Representantes, kaupod an mga proyekto nga posible maisumpay ha mga tawo nga harani ha Presidente.
Bisan man kun waray hiya nahibabaruan nga myembro han mayorya nga nagsulod han ira mga proyekto nga ginpapaburan ha panukala nga budget, ginmalatumat ni Lacson nga naaabat niya an pagkakaurusa han iya mga kaurupod subay ha iya mga pag-iistorya.
Ha butnga han panginano han 2027 budget, ginlalauman nga magigin importante nga istoryahon ha Senado an pagtudlok ngan pagtanggal ha mga alokasyon nga waray sakto nga rason, kadungan han pagduduso han mas abri ngan klaro nga proseso han pag-aalutaga han pondo han gobyerno.
