Utro nga iginparayaw ni Senator Robin Padilla an iya paghuhuman ha “University of Prison,” kasunod han mga nagin reaksyon han publiko mahuman ini niya igpahayag ha butnga han impeachment trial ni Vice President Sara Duterte ha Senado.
Ha usa nga pahayag nga ginpaangbit ha social media, gin malatumat ni Padilla nga iginpaparayaw niya an haros tulo katuig nga pagpapabilin ha presohan mahitungod nga dinhi nga nahibaruan an importante nga leksyon ha kinabuhi ngan nahulma an iya pagkatawo.
Gintawag han senador an iya eksperyensya kumo usa nga “unibersidad han kinabuhi.”
“Ipinagmamalaki ko po talaga ang 3 taon ko sa University of Prison. Dito sa lugar na ito ang tunay na unibersidad ng buhay… Madali lang ang pumasok dito. Ang mahirap ay ang makalabas at mag-graduate with honors o with death,” sumala kan Padilla.
Syahan na nga nagin irustoryahan an nagin pahayag han senador ha impeachment proceedings han igapahayag hini nga naghuman hiya ha “UP.” Ha pag-iha, gin klaro niya nga an iya gintutudlok in an “University of Prison” ngan dire an University of the Philippines.
Sumala kan Padilla, an iya eksperyensya ha sulod han presohan in an nagtutdo ha iya hin disiplina, pagpapaubos, ngan importante nga leksyon nga daw dire nahibabaruan ha sulod han tradisyunal nga klasrum.
Manunumduman nga napreso hi Padilla dida han dekada ’90 kasumpay han kaso nga illegal possession of firearms. Pag-iha in naabswelto ini ngan nakagawas mahuman an haros tulo katuig nga pagkakapreso.
Samtang, tunga naman an opinyon han netizen kasumpay ha nagin pahayag han senador. Mayda pira nga nagpahayag hin suporta ha iya panlantaw, samtang mayda naman iba nga nabatikos ha paggamit han katawagan nga “University of Prison” kumo paghulagway ha iya nagin eksperyensya ha presohan.
