TACLOBAN CITY – Ginpangunahan ni Senator Imee Marcos an panhatag hin maabot PHP3 million nga ayuda pinansyal ha mga benipisaryo han programa hiton Department of Social Welfare and Development (DSWD) nga Assistance to Individual in Crisis Situation (AICS) ha Isabel, Leyte.
Sumala kan Isabel Mayor Edgardo ”Dodo” Cordeño, maabot hin mil nga indibidwal tikang ha 24 nga mga barangay han bungto an nakakarawat hin tag 3mil pesos.
Dida daw han nakalabay nga Sabado tumawag mismo an senadora kon diin nagpasabot ini nga an ira bungto in usa ha kakadaon para ha distribusyon han mao nga ayuda.
Nagpasalamat naman an alkalde kay syahan nga higayon nga may bumisita nga senador ha Isabel, Leyte para pangunahan an panhatag hin ayuda.
Samtang, ginhangyo gihapon ni Cordeño hi Sen. Marcos nga mabuligan an mga naukoy ha relocation sites ha Brgy. San Roque, Sta. Cruz ngan Sto. Rosario agud magin ira na an ira tuna ngan balay nga gin uukyan.
”Ini nga relocation sites ha Isabel Leyte, maiha na ini hin duro, one of the projects ini ni President Marcos ngan First Lady Imelda Marcos hadto nga waray kaproseso. Ginhangyo ko kan Senadora nga maproseso ini ngan matagan hira hin title kay kairo nira, maiha na hira nga nag uukoy”, pahayag ni Cordeno.
