TACLOBAN CITY – Ginsiguro han Philippine National Police (PNP) nga mas mahugot an ira ginlatag nga seguridad kasumpay han nagpapadayon nga Eastern Visayas Regional Athletic Association (EVRAA) ha Ormoc City.
Sumala kan Police Brigadier General Dionardo Carlos, Regional Director han Police Regional Office 8 , 246 nga mga kapulisan an ira gindeploy ha Ormoc City para ha seguridad han maabot 9,516 nga mga delegado.
An mga ini in nakadeploy ha 27 nga mga playing venues ngan 13 nga mga billeting schools kon diin nagpipirme an mga atleta ngan iba pa nga delegado tikang ha iba iba nga parte han Sinirangan Bisayas.
Labot la hini, 542 nga mga kasundaluhan ngan force multiplier an kasugbong han kapulisan para mas mapakusog pa an seguridad ha syudad.
Gin -aghat naman ni Carlos an publiko ngan mga partisipante nga igreport ha ira buhatan an anuman nga kaduda-duda nga mga aktibidad nga posible magdurot hin kasamok ha nagpapadayon nga paisan-isan.
Mababaruan nga an EVRAA an pinadako nga sports event ha rehiyon kon diin nagpapaisan-isan an mga atleta tikang ha 13 nga divisions han rehiyon otso.
