NATIONAL – Nagpatapud hi Pres. Ferdinand Marcos Jr. nga papahugton han gobyerno an katalwasan ha mga eskuylahan ngan an professional development han mga magturutdo ha bug-os nga nasud.
Sumala hini nga padayon nga nakikipagbinuligay an gobyerno ha mga kag-anak, komunidad ngan iba pa nga concerned agencies agud himuon nga mas talwas ngan mas nabaton ha mga pankinahanglan han mga estudyante an mga eskuyalahan.
Gintagan-duon gihapon hini an pagpapaupay ha pangandaman ngan training han mga magturutdo ha bug-os nga panahon han ira karera, kaupod an mga pitad sugad hiton scholarship program para han Teacher Education Centers of Excellence, ngan My Teacher Education Commons (MyTEC), usa nga digital platform para ha padayon nga pag-aram han mga magturutdo.
Samtang, nagpasalamat naman an Presidente ha mga magturutdo ha bug-os nga nasud ha ira paningkamot ngan dedikasyon ha kada adlaw.
