TACLOBAN CITY–Arestado an usa nga security guard ha usa nga skwelahan ha Brgy. 88 San Jose matungod ha panmusil hine ha iya katrabaho.
Ginkilala an suspek nga hi alyas “sarge’ 38 anyos, nga residente han Cametic, Palo Leyte.
Samtang an biktima naman in ginkilala nga hi alyas “Bong”, 21 anyos usa nga working college student, ngan residente han Abuyog Leyte.
Sumala kan, PCpt Anulfo Abayan, Deputy Station Commander, San Jose Police Station 1, basar han imbestigasyon, natabo an insidente kaagahon han ika 10 han Nobyembre ha guardhouse han nasabi nga skwelahan, kun diin gin-ayat han suspek nga makig-inom ha biktima, ngan samtang nakaturog an biktima matugod han kahubugan, iya ine ginpanmumusil.
Nakag-angkon naman hin daplis nga igo ha nawong an biktima ngan dayon ine nga gindara ha ospital agud nga tagan hin medical nga atensyon.
Ha pagkayana talwas na an biktima ngan nakagawas na ine ha ospital.
Samtang, ginpasakahan naman hin kaso nga frustrated murder an suspetsado.
