Anay Leyte Gov Icot Petilla lusot na ha kaso nga graft
TACLOBAN CITY – Lusot na ha kaso nga graft an anay gobernador han Leyte ngan anay Department of Energy (DOE) Secretary Carlos Jericho “Icot” Petilla mahitungod han daw pagtalapas han iya katungod ha malaksi nga disposisyon han iya kaso.
Hi Petilla in ginkasuhan ha pagtalapas han Section 3(e) han Republic Act 3019 o kon Anti-Graft and Corrupt Practices Act mahitungod han daw maanomaliya nga pagpalit hin 350 gallons hin Florida Green Foliar Liquid Fertilizer nga kantidad nga P5,000 per gallon dida han nakalabay nga Disyembre 28, 2004.
Ha iya motion to quash gindig-unan ni Petilla nga an kaso ala kontra ha iya nga gin-file Office of the Ombudsman han nakalabay nga Hunyo 21, 2013 – in 9 katuig, usa kabulan ngan 26 kaadlaw anay san-o mapirmahan an memorandum of agreement (MOA) kasumpay han procurement.
An charge sheet in umabot ha Sandiganbayan han Abril 6, 2018, kon diin umabot anay hin 12 katuig ngan 2 kabulan ngan 12 kaadlaw san-o hiya pasakahan hin kaso ha Office of the Ombudsman
Ginkatigan han Sandiganbayan an mosyon ha merito han kaso ni Petilla pero ha ruling han korte umabot la hin 4 katuig, 9 kabulan ngan 16 kaadlaw an kahilab-on hini.
Bisan kon nanindugan an prosekusyon nga hi Petilla an rason ha pagkadelatar ha ira pag issue han resolution ha iya kaso, gindig-unan han SandiganBayan nga an Office of the Ombudsman in mayda constitutional mandate nga palaksihon an disposisyon ha mga kaso nga igin-file ala kontra han mga public officilas ngan employee.
Kinahanglan magin strikto daw ini ha pagfile han pleadings nga nasusubay Rules of Procedure.
Waray daw kapamtud-i han prosekusyon nga reasonable an pagkadelay han kaso sanglit gintalapas hini an katungod ni Petilla ha speedy disposition han iya kaso
Mababaruan nga nakaalinggawas na gihapon hi Mayor Remedios Petilla ha kaso nga graft nga ginpasaka haiya kaupod an Leyte Assistant Provincial Treasurer Rodolfo Badiable, ngan Castle Rock Construction representative Marilyn Castillo.
