TACLOBAN CITY – Samaran an usa nga habala-habal driver mahuman ine nga pagpusilon ha Brgy. Hilagpad, Tanauan, Leyte.
Ginkilala an biktima kan Vicente Barcala Jr. Tolibas, 46 anyos an pangidaron, usa nga habal-habal drayber ngan residente han Brgy. Hilagpad, Tanauan, Leyte.
Sumala kan PLT. Edmer Alfonso Saavedra, Deputy Chief of Police hitun Tanauan Municipal Police Station, may-ada hira nakarawat nga tawag tikang ha usa nga concerned citizen nagpapasabot nga may-ada shooting incident nga nahitabo ha Brgy. Canramos Tanauan, Leyte kun diin dayun naman ine nga ginkadto han mga kapulisan.
Basar han inisyal nga imbestigasyun, an mao nga biktima in nalingkod han iya motor ngan tigda nala panmumusilon han waray pa kakilal-e nga mga riding in tandem kun diin nakasul-ot ine hin itom nga jacket ngan nakasakay ha single nga motor.
Sumala hiton mao nga opisyal, nakatulo pusila an biktima nga nag angkon hin samad ha diru-dilain nga parte han iya lawas ngan dayun naman ine gindara ha Schistisomiasis Hospital hitun Palo, Leyte.
Dugang pa hine, nakuha ha panhitabo an 3 fired empty shells hitun 45 caliber pistol ngan nakigsumpayan naman an mao nga mga opisyal ha SOCO para ma proseso an hinungdan han insidente.
Ha pagkayana in padayun la gihapon an ginbubuhat nga hot pursuit operation han mga kapulisan agud mga mahibaruan an pangilal-an han nasabi nga suspetsado.
