TACLOBAN CITY – Ginbaton ni Samar 2nd District Congressman Michael Tan an mga nagkokomento hiunong han mga lubak-lubak nga mga kakarsadahan han Samar.
Kun mahihinumduman in damo nga mga katawhan an naaraba na mahitungod han kalidad han mga karsada han mao nga probinsya nga kun diin, an iba in ginkompara pa ha iba pa liwat nga mga probinsya han Sinirangan Bisayas.
Sumala kan Tan, nga an mga Maharlika Highway in diri aada ha ilarom hitun Provincial Government ngan limitado la an kontrol hini mahitungod nga aada ini ha ilarom han National Government.
“Maharlika Highway is under the National Government ngan dire ito kanan Provincial Government, tanan nga pondo pag-ayad hit Maharlika Highway tikang ito ha National Government, asya guti it aton control hito.”
Ha kaluyo naman hini in iginpatapod han Kongresista nga ginpapaabot ini ha kauluhan nga isyu.
“Pero nevertheless, aton gin papaabot ha National ito nga aton problema. Natatagan gad kita hin pondo, pero dire la ugaring tig daragko asya nga dire tigda an pag-ayad han tanan nga ruba nga kalsada, nakita man niyo nga naayad ngan nag improve na an Catbalogan to Calbiga nga part han Maharlika, ha Pinabacdao ngan Santa Rita gin aayos gihapon pero dire la tigda kay guti pala an pondo para ha 2024 pero ha 2025 mas matatagan naman focus ito nga area.”
Ginyakan gihapon hini nga sayop an pagkukumpara han karsada ha probinsya ha iba pa liwat nga mga probinsya han rehiyon.
“Kun iyo naman liwat ig compare it kalsada hit Eastern Samar ngan Samar (Western), SAYOP ito nga comparison kay it Eastern Samar Highway dire part han Maharlika asya nga dire damo it naagi so mag-iiha liwat ito maruba it kalsada.”
“Kun iyo naman ig compare it kalsada hit Samar (Western) ha Leyte, SAYOP gihapon ito kay it Leyte nag sasanga it kalsada, an iba tikadto Ormoc para kumadto Cebu, an iba tikadto ha Southern Leyte para kumadto ha Mindanao ngan iba pa nga lugar, karuyag signgon dire parehas ha Samar nga usa la it agihan so tanan maagi gud ngan waray ka papaibhan asya nga mas damo nga awto an naagiha ha aton so mas malaksi liwat maruba an aton kalsada.” Dugang pa ni Tan.
Gintagan gihapon niya hin duon nga importante an pag aayad han mga karsada ha kaluyo nga maupay pa an mga ini.
“Kun napakiana liwat kamo kay ano nga gin ruruba it maupay pa nga kalsada. May pakiana liwat ako ha iyo, bago maruba it mga kalsada ha Maharlika, maupay man anay ito diba? So an akon pakiana, san-o ta man aayuson an kalsada? Huhulton ta maruba bago ayuson o aayuson ta bago maruba? (An nagpa-plano naman ngan nag-schedule hito nga mga pag ayad hit Maharlika Highway, it DPWH dire it Congressman or Governor)”
Pagklaro pa niya nga waray daw politiko nga nadiri nga magin malaksi an pag aayad han karsada.
“Hino ba liwat nga politiko it nadire malaksi nga maayad it kalsada? Gin-papahinumdom ko, an trabaho hit Congressman an pagpa-abot han aton mga concerns han aton distrito ha National pero may limitasyon an aton gahom, an National Government gihap it magbubuot hiunong hit paghatag hin pondo ha aton.” Pagklaro pa ni Tan.
Hingyap gihapon niya ha mga netizen nga sano magpinan komento para hitun mga shares ngan mga clout in mag research daw anay kuno.
