TACLOBAN CITY – Nagtutuo hi Samar 1st District Representative Edgar Mary Sarmiento nga dire shootout kundi ambush an nahitabo ha pagpatay kan Calbayog City Mayor Ronald Aquino.
Sumala kan Cong. Sarmiento, damo an mga witness nga nagpakakita nga klaro nga dire tikang ha sarakyan ni Mayor Aquino an nauna pagpabuto hin pusil ha kampo han Samar PDEU ngan mga kapulisan.
Ginkwestyon gihapon hini kun lehitimo man an mao nga operasyon han mga kapulisan kay-ano nga nagpakasul-ot la an mga ini hin bonnet ngan waray marka an gamit nga sarakyan.
Tungod hini, para kan Sarmiento agud nga magkaada hin impartial investigation kinahanglan nga an National Bureau of Investigation an magkapot han imbestigasyon ngan dire an PNP tungod nga uniformed personnel an dabi ha mao nga insidente.
Gintagan gihapon hini hin duon nga mas matapod hiya ha magiging imbestigasyon han NBI.
Makikipaghimangraw gihapon an mao nga kongresista kan DOJ Secretary Menardo Guevarra para ighangyo nga an NBI an magdumara hin imbestigasyon.
Nanawagan gihapon hi Sarmiento kan Presidente Rodrigo Duterte nga maghatag hin bulig agud nga makab-ot an hustisya para kan Mayor Aquino.
