PHOTO COURTESY: 801st Infantry Brigade
TACLOBAN CITY – Iginpahayag han usa nga opisyal han Philippine Army nga naghitaas pa an ihap han mga estudyante ha kolehiyo ngan unibersidad iton nag enroll ha Reserve Officer Training Course ( ROTC) program ha Sinirangan Bisayas.
Sumala kan Col. Norman Zuniega, Commander han 8th Regional Community Defense Group( RCDG) nga lumobo ha 236 percent o kon 8,362 nga mga estudyante an kumuha hin ROTC ha school year 2018-2019.
Mas hitaas ini kon ikukumpara ha 2,491 nga nag enroll ha school year 2017- 2018.
Pinakadamo nga mga estudyante an nag enroll ha Visayas State University Baybay Campus kon diin mayda hira 901 nga mga kadete yana nga school year kon ikukumpara ha 127 nga ihap han nakalabay.
Nagtutuo hi Zuniega nga kon magkakaada hin mandatory ROTC mas magkakamayda hin disiplina an mga kabataan ngan mainstalar an “culture of obedience” ha ira mga huna huna.
“Kung mayroong mandatory ROTC sa estudyante sa senior high school magkakaroon ng culture of obedience at disiplina kung saan hindi lang ito makakatulong sa mga estudyante kundi pati na rin sa kanilang mga magulang at sa bayan” an pahayag ni Zuniega ha pakikipaghimangraw han Bombo Radyo Tacloban.
Mababaruan nga ha pagkayana in naipasar na ha ikatulo nga pinakaurhi nga pagbasa ha Kongreso an House Bill 8961, usa balaudnon nga magmumugna nga igpailarom ha mandatory ROTC an mga estudyante ha senior high school ha bug os nga nasod.
Ha ilarom hini nga programa, an ROTC in magigin requirement for graduation ha mga estudyante ha pampubliko ngan pribado nga eskwelahan.
Kumpyansa naman an mao nga opisyal nga makakabulig an mao nga programa nga maundang an mga gindudumara nga recruitment han New People’s Army (NPA) ha mga kabataan.
Mas mapapakusog gihapon daw han Pilipinas an national security tungod mas madamo an ihap han mga reservist nga pwede nga dumepensa ha nasud labi na ha panahon hin giyera ngan krisis.
Mababaruan nga otomatiko nga nagigin reservist an mga naggradwar ha ilarom han ROTC program.
Ha pagkayana an ROTC in nagpapabilin nga optional para ha mga estudyante ha kolehiyo ngan unibersidad kumo usa nga subject ha ilarom han National Service Training Program ( NSTP ).
