Mahuman madukdok an bulawan nga medalya ha Japan Fried Chicken Grand Prix, ginbuyagyag han tag-iya han Wakatori restaurant an nakakakalas nga sikreto ha luyo han ira kalangpusan—an ira mantika nga 66 katuig na nga ginagamit ha pagluluto in waray pa balyu-i tikang han mag-abri an ira kaunan dida han 1960.
Sumala kan Yoshihiro Tsuchiya, an ikatulo ka-henerasyon nga tag-iya han Wakatori, an ginpa-iha nga mantika o aged oil an pangunahon nga sakot ha ira sikat nga fried chicken. Naghahatag daw ini hin komplikado nga aroma ngan kakaiba nga rasa nga dire akos tugbangan kun magamit la hin puro nga bag-o nga mantika, rason agud makalamang hira ha ira mga kakumpetensiya.
Mahitungod ha nasabi nga rebelasyon, malaksi nga nakakuha hin pagkabaraka ngan batikos an Wakatori ha social media kun diin gin akusahan ini nga iginbubutang ha kadelikaduhan an panlawas han ira mga customers.
Sugadman, malaksi nga gin klaro han Wakatori nga mahirot nira nga ginpapabilin an kalidad han mantika pinaagi han adlaw-adlaw nga paglilimpyo, pagsasara, ngan pagdudugang hin bag-o.
Kada gab-i, ginsasara han mga staff an mantika, nagbibilin la hin gutiay nga parte han luma nga mantika kumo “base” han rasa, ngan ginhahaluan hin usa nga bag-o nga batch. Nangangaruyag-sidngon ini nga dire na eksakto nga parehas nga mantika tikang han 1960 an ira gingagamit, sugadman in teknikal nga mayda mga molekula la gihapon tikang ha orihinal nga mantika an nagpapabilin ha ira lutuan.
Maipaparehas an nasabi nga diskarte ha ginbubuhat han pira nga kaunan ha ira mga sabaw (broth). Pananglitan hini an sikat nga kaunan ha Otafuku ha Tokyo nga sobra 70 katuig na nga dire nagbabalyo hin broth para ha ira oden, sugadman an usa pa nga kaunan ha Bangkok nga 50 katuig na nga iginpapadayon an tradisyon.
Ha kaluyo hini, naghatag hin mahugot nga pahimatngon an mga eksperto ha pagkaon. Subay ha mga ini, an mantika in dire kaparehas han sabaw mahitungod nga an pauru-utro nga pagpapaso hini in naghihimo hin mga delikado ngan nakaka-kanser nga kemikal sugad han trans fatty acids ngan acrylamide. Bisan pa kun adlaw-adlaw ini haluan in bag-o nga mantika, dire mapupugngan an panmaihaan nga pagtirok hin mga nakakahilo nga sakot ini.
