NATIONAL – Iginduduso ni Leyte 1st district Rep. Ferdinand Martin Romualdez nga magin balaod an House Bill 14 o “Crop Insurance Bill.”
Ine in mahuman nga igduso gihapon ni Presidente Ferdinand Marcos Jr nga pahalauagon pa an crop insurance coverage para proteheran an mga Pilipino nga parag-uma.
Panuyo han balaudnon nga mapakusog ngan mapahaluag an serbisyo han Philippine Crop Insurance Corporation o PCIC, ngan magin abri ha pribado nga sektor pag-abot ha agricultural insurance.
Ha oras nga magin balaud an House Bill No. 14, an sakop han PCIC in dire nala humay ngan mais, kundi pati an high-value commodities, mga hayop, aquaculture, makinarya, ngan post-harvest infrastructure.
Gintagan-duon ni Rep. Romualdez nga an iya balaudnon in nasusubay ha pagduduso ni Presidente Ferdinand Marcos Jr. nga mas maproteheran an mga Pilipino nga parag-uma ngan masigurado an seguridad ha pagkaon ha nasud.
Natuod hi Romualdez nga kun mayda maupay nga insurance in magkakamay-ada hin peace of mind an mga parag-uma labi na ha panahon han kalamidad.
