TACLOBAN CITY – Nagpalusad hin Red Tide Advisory an buhatan han Bureau of Fisheries and Aquatic Resources Region 8 ha pira nga kadagatan ha Sinirangan Bisayas mahuman nga makita-an nga nagpositibo ha Pyrodinium Bahamense an katubigan han mga ini.
Naka-isa an local red tide warning ha kadagatan han Cancabato Bay ha Tacloban City sugad man an Irong-Irong Bay ha Catbalogan City kun diin, ginpapahimatngunan an publiko nga sumunod hini nga warning advisory ngan kun mahihimo in likayan laanay kumaon o kumunsumo hin mga pangtion ngan “alamang” o hipon hini nga kadagatan agud malikayan an peligro nga dara hini.
Nagpapabilin naman nga nakapailarum la gihapon ha Shellfish Ban an Matarinao Bay ha Eastern Samar nga sakop an kadagatan han General MacArthur, Quinapondan, Hernani, ngan Salcedo, mahitungod nga nagpositibo ha saxitoxin nga nagdudurot hin Paralytic Shellfish Poisoning an shellfish meat samples nga ginkolekta han buhatan hini nga kadagatan.
Samtang sumala naman han BFAR 8, nga an isda, nu-os, pasayan ngan masag nga tikang hini nga mga kadagatan in puydi igkonsumo basta siguraduhon nga presko an mga ini ngan gintanggalan hin mga hasang ngan lamang-loob an mga ini ngan ginhugasan hin maupay.
