NATIONAL – Posible nga ada ha 15 ngada ha 16 na nga mga senador an pumirma ha ginpapalibot nga resolusyon para igpabilin hi Senador Chiz Escudero kumo Senate President han 20th Congress.
Bisan man kun waray na igsapubliko ni Sen. JV Ejercito kun hin-o an nagpapirma ha iya, ginpahayag hine nga dida han nakalabay nga bulan umabot ha iya opisina an resolusyon para abuyunan an pagpapabilin ni Escudero kumo presidente han Senado.
Pag-eksplikar han senador, amu hiya pumirma in mahitungod nga kaparte na hiya han liderato kumo deputy majority leader ha ilarom han pagmamangulo ni Escudero kumo presente nga Senate President.
Ine daw in paghahatag gihapon hin kortesiya ngan respeto kan Escudero mahitungod nga tumapod ine ha iya ngan ginbutang hiya ha pwesto sanglit susuportahan niya ine.
Pag-amin naman ni Ejercito, bisan pa man kun suportado niya hi Escudero in nagruruha-duha la gihapon hiya mahitungod nga magkadukot gihapon hira ni Senador Tito Sotto.
Samtang, natuod naman hi Ejercito nga magigin exciting ngan healthy an posible nga pagbabag-o ha dynamics han Sendo in kaso nga bug-uson han mga beterano nga magbabalaod nga hira Sen. Tito Sotto, Sen. Juan Miguel Zubiri, Sen. Ping Lacson, ngan Sen. Loren Legarda an minority bloc ha ika-20 nga Kongreso.
Subay ha mga report, kaupod daw hi Sen. Lito Lapid ha gintatawag nga veterans bloc, pero sumala kan Zubiri, libre hi Lapid nga umupod ha majority bloc kun kakaruyagon niya.
