TACLOBAN CITY – Patay an usa nga pulis mahuman nga aksidente nga mapusil han iya igkasi pulis ha San Jose de Buan, Northern Samar.
Sumala kan PSSupt. Nicolas Torre III, Police Provincial Director han Samar, tikang ha operasyon ha Brigada Eskwela an mao nga mga pulis han Samar Police Provincial Mobile Force Company (SPPMFC) ngan samtang naglilimpyo han iya pusil an suspek nga hi PO1 Jesrel Ebatados in waray hiya kapansin nga may bala pa ngayan ha sakob hini.
Aksidente hini nga nakalabit an pusil ngan naigo ha ulo an biktima nga hi PO1 Mark Anthony Austria.
Dayon naman nga gindara ha ospital an biktima pero ginbawian ini hin kinabuhi mahuman an pira ka oras.
Samtang, naghaon naman hin kaso an pamilya han biktima pero nakapagpiyansa an nakapusil hin P40,000 para ha temporaryo nga kagawasan hini.
Ha pagkayana in padayon pa an gindudumara nga imbestigasyon han mga kapulisan pero ginklaro han mag ini nga aksidente la an nanabo ngan waray delito ha butnga han duha nga pulis.
