BARUGO, LEYTE – Nadisgrasya ha kadalanan an Patient Transport Vehicle han LGU Tunga, Leyte ha National Highway han Brgy. Abango, Barugo, Leyte.
Ginkilala an driver han PTV kan alyas Luis, empleyado han LGU Tunga, ngan residente han Brgy. San Antonio Tunga, Leyte.
Sumala kan Barugo Municipal Police Station Chief of Police, PMaj. Darwin Dalde, tikang ha Carigara an nasabi nga sarakyan ngan tibalik na unta ha Tunga, Leyte han mahitabo an disgrasya.
Basar ha inisyal nga imbestigasyon, sumala ha driver han sarakyan, pag-abot niya ha nasabi nga lugar in nahingaturog hiya sanglit tumabok an iya gin mamanihuan nga sarakyan ha kaluyo nga karsada ngan sumurop ha may kasagingan.
Nag-angkon naman hin kasamdam ha lawas an tulo nga sakay han PTV ngan dayun nga gindara ha Carigara District Hospital.
Talwas naman an driver ngan kawaray kasamari han panhitabo.
Ha pagkayana in ada na ha kustodiya han Brgy. Officials han Brgy. Abango, Barugo, Leyte an nasabi nga ambulance.
