EASTERN SAMAR – Ginpresentar han Philippine Statistics Authority (PSA) an opisyal nga resulta han 2024 Community-Based Monitoring System (CBMS) para ha probinsya han Eastern Samar.
Sumala kan Senior Statistical Specialist Randy G. Ador han PSA–Eastern Samar nga an CBMS, nga ginmamanduan han Republic Act No. 11315 nga ginpirmahan ni anay Presidente Rodrigo Duterte, amo an usa nga technology-based system nga nagtitirok ngan nagba-validate hin datos nga puydi gamiton ha lokál nga pagplano ngan implementasyon hin mga programa.
Ha Eastern Samar, nagtikang an pagtirok han datos hadton Hulyo 15 tubtob Oktubre 8, 2024.
Ginmobilisar an 330 enumerators ngan field staff para masakop an 597 barangay, diin 118,198 nga panimalay an boluntaryo nga nakiusa.
Nahipatik naman ha datos nga 96.13% na han mga panimalay an mayda kuryente, samtang 3.87% an waray pa.
Ada naman ha 31.48% an nagamit hin kuryente o LPG ha paglutò ngan 68.52% an nagamit pa hin kahoy, uring o gaas; 94.66% an may access ha malimpyo nga tubig nga irimnon ngan 5.34% an waray pa.
Nahipatik naman an pinakahataas nga open defecation ha Jipapad (19.41%) ngan Maslog (16.37%).
Samtang, 99.92% han panimalay ha Maslog an waray sigurado nga tenure status, nasunod an San Julian (5.26%), Llorente (4.31%), Arteche (3.95%), ngan Hernani (3.57%).
Sumala ha PSA, magigin giya ini nga datos ha mga lokal nga pangobyernuhan ha pagdisenyo han sakto nga mga programa ngan polisiya, agud matuman an basic services ngan masiguro nga waray mabayaan nga kumunidad. (via Bombo Shiela Encio)
