TACLOBAN CITY– Ginpahayag han Department of Social Welfare and Development (DSWD) Region 8, nga maagi pa ha mahugot nga pag-istudyo ngan deliberasyon an proposal nga igconvert ha bugas an cash grant, nga nakakarawat han mga benepisaryo han Pantawid Pamilya Pilipino Program (4Ps).
Ha ekslusibo nga pakipaghimangraw han Bombo Radyo Tacloban kan Atty. Jonalyndie Chua, Regional Information Officer han DSWD VIII, ginpahayag hini nga abre an ira buhatan ha mao nga proposal, pero nagtutuo hira nga kinahanglan anay ini pag istudyuhan hin maupay kun kaangayan ba ini igpatuman ngan kun mas makakaupay ini ha mga benepisaryo han 4PS.
Ginmalatumat han nasabi nga opisyal, nga ine in ginduduso han Department of Agriculture (DA) nga imbes nga cash, in bugas nala an igpanhatag ha mga beneficiaries han 4Ps partikular na an nakakarawat han mga ini nga health and nutrition grant.
Dugang pa han mao nga opisyal, anuman an magin resulta han mapagkasarabutan han National Adivosry Council (NAC) in amo an susundon ngan igpapatuman han ira buhatan.
