TACLOBAN CITY — Ginpakilala ni Department of Science and Technology 8 Regional Director, Dr. John Glenn Ocaña, an bag-o nga teknolohiya ha agrikultura nga tinatawag nga project SARAI.
An Smarter Approaches to Reinvigorate Agriculture as an Industry o (SARAI) in usa nga digital-based platform nga ginhimo han University of the Philippines Los Baños ha bulig hiton DOST, nga yana in handa na igpatuman ha bug-os nga nasud.
Ha Eastern Visayas, gintikangan na an promosyon ngan implementasyon han programa tikang pa han nakalabay nga tuig.
Panuyuan hini nga SARAI nga buligan an mga LGUs ngan mga parag-uma ha agrikultura gamit an science, technology, ngan innovation.
Ginagamit hini nga SARAI an combination han satellite images, remote sensing technologies, ngan iba pa nga sensors para makalikom hin datos hiton temperatura, humidity, ngan kondisyon hiton tuna.
Ini nga mga impormasyon in ini-input ha system agud makabug-os hin data-driven plan hiton pagtatanom, pagha-harvest, ngan pamamahala han mga pesticides.
Ginlalauman nga ha mga masunod nga tuig in mas damo nga mga bungto ha Eastern Visayas an magpapatuman hin SARAI kumo kaparte han pagduso han digitalization han agrikultura ha rehiyon. (via Bombo Shiela Encio)
