Ginpatwag han Movie and Television Review and Classification Board an production team han hit ABS-CBN primetime series nga “Sigabo” kumo kaparte han ira “Responsableng Paggabay” initiatives mahuman makakarawat hin mga reklamo kasumpay ha duro nga pagpapakita hin mga bayolente nga scenes an programa.
Ginmalatumat han MTRCB nga nagdumara ini hin “compliance seminar” para ha mga producer ngan tinaglawas han programa ha ha Quezon City.
Panuyuan han seminar nga magkamayda hin dayalogo ha butnga han MTRCB ngan han production team agud magkamayda hin mas klaro nga pag-intinde ha mga aludayday para ha age-appropriate content samtang ginkilala gihapon an importansya han artistic creativity ngan responsable nga “pag-iistorya”.
Dugang pa han ahensya nga karuyag la nira nga suportaran an industriya han telebisyon ha paghimo hin mga de-kalidad ngan makabuluhan nga programa nga dire napapabay-an an epekto hini ha mga nagkikita, labi na ha mga bata.
Samtang, positibo naman nga ginkarawat han producer han serye an inisyatiba han MTRCB. Nagpapasalamat an kumpanya ha higayon nga mas maintindihan an mga aludayday ngan standards han ahensya ngan ginpatapud han mga ini an responsable nga paghimo hin salida ha telebisyon.
