(WESTERN) SAMAR – Gin pailarom na ha State of Emergency an bug-os nga probinsya han Samar mahitungod han epekto han restriksyon nga ginpapatuman ha San Juanico Bridge.
Kun diin, gin aprubahan an nasabi nga desisyon ha gindumara nga regular session han Sanggunian Panlalawigan han Samar, kakulop nga adlaw, Mayo 20.
An nasabi nga deklarasyon in kinahanglan agud makag-alutaga hin pondo ngan masolusyunan an sitwasyon ngan masuportahan an mga LGUs ngan iba pa nga sektor mahitungod han sitwasyon han tulay.
Ha lain nga bahin, nagpapabilin nga naka-isa la gihapon an blue alert status ha bug-os nga Sinirangan Bisayas mahitungod han ginpapatuman nga 3 metric ton axle load limitation ha mga sarakyan nga maagi ha tulay.
Sumala kan Office of the Civil Defense Regional Office VIII Director, Lord Byron Torecarrion, an pagbutang ha blue alert status ha rehiyon in agud mas mapadali an pag responde han mga buhatan ha panginahanglan han nasabi nga tulay ngan ha paghatag hin mga hinabang ha mga apektado nga mga pasahero durot han load restriction ha San Juanico Bridge.
Samtang, iginpatuman na gihapon han Department of Public Works and Highways nga an mga sarakyan nala nga mayda maximum height nga 3.2 meters la an gintutugutan nga makatabok ha San Juanico Bridge, samtang an mga truck ngan iba pa nga mabug-at nga sarakyan in kinahanglan na nga dumirekta ha mga pantalan nga gintudlok han Philippine Port Authority agud makatabok ha Leyte.
An nasabi nga pitad in agud nga masiguro an katalwasan han publiko ngan malikayan an duro nga kaguba han San Juanico Bridge. (via Bombo Niña Magpili)
