TACLOBAN CITY- Ginpailarom na ha State of Calamity an probinsya han Biliran, matungod ha nagin epekto han bagyong Opong han nakalabay nga semana.
Sumala kan Cong. Gerardo “Gerryboy” Espina Jr.Biliran, dako mangud an ginbayaan nga danyos han bagyong Opong ha ira nasasakupan, partikular na ha mga pananom, eskwelahan, kabablayan ngan magin ha mga imprastraktura, kun diin ha ira pagbana-bana in umabot ha 1,000 nga panimalay an nagkaguguba.
Labot la ha mga nagkakaguba matungod han paghitaas han tubig baha, nakaghipatik an nasabi nga probinsya hin 10 nga naawat hiton kinabuhi matungod han nasabi nga kalamidad kun kadam-an han mga namatay in taga isla han Maripipi ngan Kawayan Biliran.
Dugang pa ni Espina, ha ira nagin monitoring, umabot ha 2,355 pamilya, o 7,329 indibidwal, an iginbakwit ha 78 nga evacuation centers ha nasabi nga lugar.
Mababaraun nga lain la ha baha, in nakaghipatik gihapon hin mga pagpanpan hiton tuna ngan buhawi kun diin ine an rason han paghitaas han tubig-baha ha mga tulay.
Ginpaangbit pa hine nga ha pagkayana, passable na an mga karsada, samtang mayda naman mga minimal damage an mga tulay ha nasabi nga lugar.
Ginbabana-bana naman nga maabot ha P1B an tanan nga ginbayaan nga danyos han nasabi nga bagyo ha probinsya han Biliran.
Ginsigurado naman ni Cong. Espina, nga nakatutok hira ha pag-asister an ira nasasakupan, sugad hiton pagkaon, ngan pangunahon nga panginahanglan han mga ine, agud nga dayon makabakdaw an mga biktima han bagyong Opong.
