TACLOBAN CITY– Nagpagawas hin abiso an buhatan hiton Prime Water Leyte Metro ha ira nasasakupan, nga magkakamayda hin temporary water service interruption ha sulod hiton 2 ka-adlaw.
Sumala kan Ronnie Cornico, General Manager, Leyte Metropolitan Water District, lauman hiton mga konsumidor nga makaka-eksperyensa hiton kaluya han awas hiton tubig ha petsa 19,ngan 20 hiton Disyembre tinikangan alas 8:00 hiton aga kutob alas 5:00 hiton kulop.
Dugang pa hine, sakop han nasabi nga water interruption an bug-os nga Tacloban, ngan ginsisigurado naman nira nga dire ine makaka-apekto hin duro ha ira mga konsumidor.
Usa mangud ha mga rason han temporary water interruption, in matungod han naka-schedule nga paglimpyo ha Water Treatment Plant 2, nga ginkukuhaan hiton tubig han mga Taclobanon.
Nag-aaro naman an mga ine hin pag-intindi, matungod nga an nasabi nga panlimpyo in para gihapon hiton igkaka-upay, ngan kalimpyo hiton dalagan han tubig ha mga konsumidor.
