Ginpapagtudlok ni Senador Risa Hontiveros hin price cap o celing an sukot ha kuryente kada panahon han emergency ngan kalamidad.
Ha Senate Bill 2361, panuyo han panukala nga proteheran an mga kunsumidor tikang ha paghitaas han sukot ha kuryente kun mayda deklarasyon hin state of emergency o calamity.
Ginpapa-amyendahan ha panukala an Electric Power Industry Reform Act (EPIRA) of 2001 kun diin tatagan an presidente hin kapas nga magtudlok hin price ceiling ha presyo han kuryente kun mayda krisis o kalamidad.
Iginduon ni Hontiveros nga dire dapat pabay-an nga waray kontrol ha paghitaas ha sukot han kuryente labi na ha panahon han krisis mahitungod nga ngatanan in apektado bisan an mga pamilya nga kalakip ha middle-income class in nakukurian gihapon ha hitaas nga presyo han pagkaon, transportasyon, medisina, ngan iba pa nga pangunahon nga panginahanglan.
Nakasurat ha panukala an pagpapatuman han 90-kaadlaw nga moratorium o pagbabawal ha diskoneksyon han kuryente ngan pag-obliga ha distribution utilities nga maghatag hin deferred payment schemes ha residential consumers, ngan micro, small and medium enterprises.
Tutugutan naman an mga kunsumidor nga magbayad la anay hin average nga monthly bill ha kuryente ha sulod han tulo kabulan samtang iginpo-protesta an paglobo han mga kabaraydan.
Gin aghat gihapon ni Hontiveros an mga igkasi senador nga suportahan an kadagmitan nga pagpasar han balaudnon.
