TACLOBAN CITY– Ginpahibaro han Philippine Coconut Authority Region 8, ha mga parag-uma hiton lubi, ngan parag lugit nga an presyo han millgate price ha pagkayana in ada ha P69.04 per kilo, samtang an farmgate price naman in ada ha P48.5 per kilo.
Sumaa kan Philippine Coconut Authority Region 8, Acting Regional Manager, Rosario Tolibas, an nasabi nga pamresyuhan han lugit ha rehiyon in dire permanente, matungod nga nasubay la an coconut oil ha gios hiton vegetable oil nga pampresyuhan ha world market.
Dugang pa ni Tolibas, matungod na gihapon ine ha damo iton ka kompetinsya nga asity nga gingagamit yana nga panahon.
Ginpaangbit pa ni Tolibas, nga yana nga panahon, kun babasehan niya ha kadamo hiton produkto han asity, an coconut oil in ada la ha 3% an mga nagamit hine.
Ha pagkayana, padayon an ira panginano ha mga coconut farm, labi na ha may Salcedo Eastern Samar , kun diin nagkamayda hin “kukulisap” nga nakakapandarahig ha mga kalubian, ngan nagdumara na gihapon hira hin pan spray ha nasabi nga mga insekto agud nga dire na an mga ine makapanapon pa ha kahigrani nga barangay.
Mababaruan nga an Leyte an may pinakadamo nga na-pro-produce nga coconut oil ha bug-os nga Eastern Visayas.
