Posible nga humitaas hin P4 an presyo han diesel samtang nakabantay gihapon nga umubos o humitaas an presyo han gasolina ha masunod nga semana, subay ha source han oil industry.
Basar ha kiwa han Mean of Platts Singapore (MOPS) ngan average nga balyuay piso kontra dolyar tikang Hulyo 6 kutob Hulyo 9, 2026, ginlalauman nga magkakamay-ada hin dako nga paghitaas ha presyo han produkto nga petrolyo.
Adi an posible nga magigin adjustment:
Diesel — mahitaas hin P2.00 kutob P4.00 kada litro
Gasolina — rollback hin P1.00 kada litro o posible nga humitaas hin P1.00 kada litro
Igin eksplikar han source nga nagpapabilin nga hitas an presyo han diesel ngan iba pa nga middle distillates mahitungod ha marig-on nga demand nga pagpapahugot han suplay.
Dugang pa dinhi an pagkabaraka ha posible nga pag-ubos han suplay han diesel tikang ha Russia mahitungod ha danyos nga durot han mga pag-atake ha imprastraktura han enerhiya hini.
Sugadman, ginlalauman nga posible humitaas utro an presyo han lana mahitungod ha mas hitaas nga demand ha panahon han katsirak ha Northern Hemisphere ngan mga limitasyon ha suplay nga durot han maintenance ngan pag-iiban han produksyon han mga refinery.
Komon nga gin aanunsyon han mga kompanya han lana an pagbabag-o ha presyo kada Lunes, ngan iginpapatuman naman pag-abot han Martes.
Subay pa ha source, nakaapekto gihapon ha pagkiwa han presyo han lana an mga tensyon ha Middle Esat, kaupod an pag-atake han Iran ha mga barko nga naagi ha Strait of Hormuz ha gawas han opisyal nga ruta nga gin aprubahan, pati na gihapon an bulos nga pag-atake han Amerika, pagbawi han US ha mga iginpatuman hini nga exemption ha sanctions para ha pag-export han lana han Iran.
