BAYBAY CITY – Nagin malinangpuson ngan marisyo an gindumara nga pag-aabri han Eastern Visayas Athletic Meet Association (EVRAA) Meet 2026 kakulop nga adlaw, Marso 1, nga ginpangunahan han host division nga Baybay City ngan han LGU Baybay.
Sumala kan Department of Education Regional Office VIII Regional Director, Dr. Ronelo Al Firmo, maabot ha 11,000 an kabug-usan nga ihap han mga indibidwal nga aadto yana ha Baybay City para han paisan-isan.
Ha nasabi nga ihap, ada ha 7,992 an mga atleta tikang ha 13 nga delegasyon han rehiyon.
Ha lain nga bahin, naghatag naman hin P3.5 milyon an ahensya han Department of Education Region 8 para han pagkaon han mga technical officials, ngan an salin kagarastuhan in ‘sagot’ na han Local Government Unit han Baybay City.
Samtang, presente naman ha pag-aabri han paisan-isan hi Cebu Province Governor Pamela Baricuatro, kun diin ha mensahe hini in gintagan-duon han gobernadora an kapas han sports ha paghulma han disiplina, leadership, ngan resilience han mga atleta.
Gin dayaw gihapon hini an mga atleta para ha dira dedikasyon ngan ginpahinumduman nga ha kaluyo han mga medalya ngan tropeo, an karakter ngan sportsmanship an tinuod nga nagpapamatuod han han tinuod nga kampeon.
Gintagan duon naman ni Dr. Firmo nga an tinuig nga regional meet in sobra pa ha kompetisyon, ini in plataporma para han pagkakaurusa ngan pagkabug-usan nga pag-ursa.
