INTERNATIONAL – Tumalikod na hi Pope Francis yana nga Lunes, Abril 21, 2025 ha edad nga 88 samtang hiya in aada ha Vatican’s Casa Santa Marta.
Hi Pope Francis, nga ginpanganak kumo Jorge Mario Bergoglio dida han Disyembre 17, 1936 ha Buenos Aires, Argentina, in anak han mga imigrante nga Italyano. Ugsa hiya sumulod ha seminaryo, umeskuyla hiya kumo chemical technician ngan nagtrabaho ha industriya han pagkaon. Ha edad nga 21, nagkamayda hiya hin sakit nga pneumonia nga nagresulta ha pagtanggal hin parte ha iya tu-o nga baga.
Dida han 1958, umapi hiya ha Jesuit novitiate ngan nag-istudyo hin Humanities ha Santiago, Chile. Hiya in nagin padi dida han Disyembre 13, 1969, ngan dida han 1973, in nabuhat niya an iya perpetual vows ha Society of Jesus.
Hiya gihapon an nagin Jesuit provincial han Argentina tikang 1973 kutob 1979.
Kumo Archbishop han Buenos Aires dida han 1998, kilala hiya ha iya simple nga kinabuhi, nakaukoy ha usa nga gutiay nga apartment ngan nagamit hin pampubliko nga transportasyon.
Hiya in nagin Cardinal dida han 2001 ha ilarum ni Pope John Paul. Dida han Marso 13, 2013, hiya in nagin Santo Papa, an siyahan nga Jesuit Pope, siyahan nga tikang ha Latin America, ngan siyahan nga dire European ha sakob han sobra 1,000 ka-tuig.
An iya pagmamangulo in nakatutok ha mga isyu sugad hiton pagbabag-o han klima, pagkaka-urusa, ngan pagbulig ha mga marginalized nga sektor han sosyedad.
