TACLOBAN CITY – Magbabaton ha balaod an mga politiko nga maghahatag hin pinansyal nga bulig ha mga walhun nga grupo kabalyo han mga botos.
Ine an nagin pahayag han Armed Forces of the Philippines kabahin han nasabi nga isyu.
Kun diin, mahitungod hine in naghimo hin pitad an mga otoridad agud mapugngan an mga walhun nga grupo nga makakuha hin suporta tikang ha mga politiko.
Resulta hine in an pagkawara han resource generation scheme han nasabi nga mga grupo ngan an paghinay han recruitment activity ngan monetary resources han mga ine, mahitungod nga waray na magsususporta ha mga ine.
Sumala kan Philippine Army 8th Infantry Division Joint Task Force 8- ELCAC Civil Military Operations G7 Assistant Chief of Staff, Lt. Col Joemar Buban, an nasabi nga buruhaton in sugad han paghatag hin suporta ha mga walhun nga grupo kabalyo han botos in pagtalapas ha Anti-Terrorism Law ngan Anti-Terrorism Financing Law.
Samtang, padayon naman nga naka-deploy an mga kasundaluhan ha mga natudlok nga kabarangayan agud maproteheran an mga residente tikang ha maraot nga buruhaton han mga walhun nga grupo sugad han extortion ngan panhahadlok, sugad man han panre-recruit hin membro. (via Bombo Niña Magpili)
