NATIONAL–Ginaalegar nga humitaas hin 590% an police killings ha syahan nga 25 ka bulan han termino ni anay Pangulong Rodrigo Duterte han 2016, sumala ha prosekusyon ha International Criminal Court (ICC).
Ha ikaduha nga adlaw han confirmation of charges, ginmalatumat ni ICC trial lawyer Robynne Croft nga ginaalegar nga sistematiko ngan mahaluag an mga pagpatay kanit hiton war on drugs.
Mayada dire maubos ha 274 ka kumpirmado nga pagpatay han alkalde pa hi Duterte ha Davao, ngan labi pa ine nga humitaas han nagin presidente na hiya.
Samtang, 3-K kutob 5-K an opisyal nga ihap han gobyerno, ginbabanabana nga pwede ine 3 pa kabeses nga mas hitaas an aktwal nga ihap sumala ha mga human rights groups.
Ha Bulacan in ginaalegar nga umabot ha 1,600% an paghitaas han police killings, ngan mas hitaas pa an ihap kada 100,000 nga populasyon kumpara ha bug-os nga nasud han India tikang 2016-2018.
Sumala ha eksperto nga nakaistorya han prosekusyon, an naguusa nga makatadungan nga eksplanasyon didi in an ginaalegar nga pagkakamayada hin mahaluag nga polisiya hin extrajudicial killings.
Ginduon gihapon han prosekuisyon nga ginaalegar nga gindara han anay presidente an gintatawag nga “Davao formula” ha national level, upod an mga kaalyado ha hittaas nga posisyon , ngan ginpakita gihapon han prosecutor an mga pahayag ni Duterte nga ginaalegar nga nagaaghat ha kapulisan nga pumatay balyo han proteksyon ngan reward.
