ODD – Usa nga Pokemon superfan tikang ha Hong Kong an opisyal nga ginkilala han Guinness World Records para ha iya “Largest collection of Gengar memorabilia.”
An iya koleksiyon nga umabot ha 1,200 nga piraso, in resulta han iya 22 ka-tuig nga debosyon ha iya paborito nga Pokemon character nga hi Gengar.
Sumala kan Tsang Cheuk Tip, 32-anyos, nagtikang an iya pagkahilig kan Gengar hadton 8-anyos pala hiya.
Ha usa nga set han mga Pokemon figure nga ginpalit han iya nanay, usa nga kolor-violet, ngan transparent nga Gengar toy an naka agaw han iya pansin.
Ha paglabay han mga tuig, ginbug-os niya an iya koleksiyon han mga official and licensed Gengar merchandise. Kaupod dinhi an mga trading cards, bado, stuffed toys, mga gamit ha kusina ngan iba pa nga stationery.
Ginamin ni Tip nga nagin makuri an proseso han pag-apply para ha Guinness record, labi na ha pag-katalogo han kada usa nga item.
Ginklaro naman hini nga dire kasikatan an iya lanat ha pagkuha han world record. An karuyag la hini in magkamayda hin halarum nga koneksiyon ha iya paborito nga Pokemon.
