TUNGA, LEYTE – Arestado an Chief of Police han Almeria, Biliran mahuman nga nahitabo nga pamusil ha Brgy. Balire Tunga, Leyte dida han Setyembre 21, 2025.
Ginkilala an biktima kan alyas Jonar, 56-anyos, ngan residente han Brgy. Parag-um, Carigara, Leyte, samtang an suspek naman in hi alyas Nonoy, 53-anyos, ngan residente han Brgy. Abango, Barugo, Leyte.
Sumala kan Tunga Municipal Police Station Officer in Charge, PMaj. Edgar Remandaban, nag-iinom an suspek ngan biktima han magkadebate an mga ine.
Samtang, nagdedebate an mga ine in naggawas hin pisaw hi alyas Jonar ngan ginbuno hi alyas Nonoy makausa. Nakalikay naman an alyas Nonoy ngan nagpabuto hin warning shot pero nagpadayon la gihapon ha pag-atake hi alyas Jonar kan alyas Nonoy, sanglit ginpusil ni alyas Nonoy hi alyas Jonar nga naigo naman ha liog.
Nagtawag naman hin ambulansya an suspek kun diin dayun nga gindara ha Carigara District Hospital an biktima pero gin deklara ine nga dead-on-arrival.
Nagdumara naman hin hot pursuit operation an Tunga Municipal Police Station kaupod an Carigara Municipal Police Station kun diin naaresto han mga ine an suspek ha Carigara District Hospital.
Nakuha naman ha suspek an usa nga 9mm Jericho pistol.
Samtang, narekober naman han SOCO an duha nga basiyo han caliber 9mm ammunition.
Ha pagkayana in ada ha kostudiya han kapulisan an suspek para han kaangayan nga dokumentason ngan disposasyon.
