INTERNATIONAL – Nagdesisyon an Constitutional Court han South Korea nga ibalik hi Prime Minister Han Duck-soo kumo acting president mahuman ibasura an impeachment case kontra ha iya.
Ha desisyon han korte, 7 tikang ha 8 mahistrado an bumaribad ha impeachment ni Han samtang usa la an pumabor nga ma-impeach an opisyal.
Sumala ha 5 justices, an impeachment motion kontra kan Han in valid pero waray sakto nga basaran agud patalsikon hiya mahitungod nga waray niya gintalapas an konstitusyon o an balaud han SoKo may kalabutan ha deklarasyon han martial law o possible nga insurrection.
Samtang, nagdesisyon naman an 2 nga justices nga an impeachment motion kontra akn Han nga nakalingkod kumo acting president hadto, in invalid mahitungod nga pakyas nga maipasa ha parliament an mosyon mahuman nga waray maabot an kinahanglan n g abotos tikang ha two-third han mga mambabalaud.
Manunumduman nga hi Han an bumalyo ha na-impeach nga Presidente han South Korea nga hi Pres. Yoon Suk-yeol mahitungod ha iya madagmit ngan pakyas nga deklarasyon han martial la dida han Disyembre 2024.
Pero waray pa duha ka semana, in na-impeach gihapon hi Han ngan ginsuspendi dida han Disyembre 27, 2024 mahitungod ha iya daw papel ha deklarasyon han martial law ngan ha iya pagtanggi ha pagtutudlok hadto hin tulo pa nga justices ha Constitutional Court nga nagdesisyon ha impeachment ni Yoon, rason nga ginakusaran hiya han opposition han pagbaribad ha impeachment trial ni Yoon nga iya kaalyado.
