Posible nga mas huminay pa an kantidad han piso ngan umabot ha P62 kutob P64 kada dolyar kun mag-iiha pa an kasamok ha Middle East ngan padayon nga mahitaas han presyo han lana, subay ha MUFG Bank.
Ha presente, lumaprak na an piso ha record low nga P60.748 dida han Marso 31. Subay ha bangko, posible lahusan han piso an P61:$1 ha ikaduha nga kwarter han 2026 kun dire maundang an kasamok ha Middle East kadungan han pag-hitaas han presyo han lana ha $120 kutob $140 kada bariles.
Dako an epekto han krisis ha Strait of Hormuz, nga importante nga aragian han lana ha bug-os nga kalibutan. Mahitungod nga naglalaum an Pilipinas ha imported nga lana, direkta nga naapektuhan an ekonomiya hini kun nahitaas an presyo.
Pahimatngon han MUFG, kada $10 nga paghitaas ha presyo han lana in posible magpahinay ha pagribhong han ekonomiya han Pilipinas ngan magpahitaas han inflation. Kun magpapadayon ini, posible lumahos ha target nga 4% an inflation ngan mapiritan an Bangko Sentral ng Pilipinas nga magpahitaas han interest rates.
Labot pa hini, posible gihapon maapektuhan an presyo han kuryente, pagkaon, ngan transportasyon, pati na an remittances tikang ha Middle East kun diin nagta-trabaho an kadam-am han Overseas Filipino Workers (OFWs).
Ha kaluyo han negatibo nga outlook, ginmalatumat han mga eksperto nga posible makabulig an pamumuhunan ha imprastraktura ngan renewable energy agud mapadig-on an ekonomiya ngan maibanan an epekto han krisis ha masunod nga panahon.
