TACLOBAN CITY – Magkadurudilain an nagin reaksyon han pira nga mga residente ngan sugad man mga resort owners ha may Costa Brava, San Jose nga maapektuhan han nakatalaan nga demolition ha mao nga lugar.
Subay ha pakipaghimangraw han Bombo News team ha pira nga mga residente nga diri hira maaram nga gagamiton an mao nga lugar para han extension han airport.
An pagdahum liwat han pira nga an mao nga tuna in privated-owned.
Diri naman malikayan nga masubo an mga ini tungod nga diri pa hira maaram kun diin hira mabakwit.
Samtang mayda naman iba nga nangangandaman na ha nakatalaan nga demolition.
Sumala kan Rey Caneso, owner han Talisay beach resort ngan residente han Costa brava, nga masunod hira ha kun ano an ikakaupay hiton siyudad.
Andam naman daw hira nga bayaran han siyudad para han ira lote nga gagamiton ha airport.
