TACLOBAN CITY – Abuyon an pira nga negosyante ha pagkakaada hin increase ha minimum wage ha Sinirangan Bisayas.
Una hini, ginpagawas na han Regional Tripartite Wages and Productivity Board VIII an panibag-o nga wage order nga naghahatag hin P50 increase ha minimum wage han mga empleyado nga igpapatuman pinaagi ha duha katranches.
Sumala kan Atty. Jerry Uy, councilor-elect han Tacloban ngan sugadman vice president han Philippine Chinese Chamber of Commerce and Industry (PCCCI) Tacloban, abuyon hira ha mao nga increase ha kinada adlaw nga sweldo han mga mananarabaho ha rehiyon tungod nga makakabulig ini agud nga mapagaan an ira ginpapas-an tungod han padayon liwat nga paghinitaas han presyo han mga papliton sugadman han presyo han produktong petrolyo ngan pamasahe.
Naglalaum naman ini nga mababalanse an mao nga wage increase ha kapas han mga employers ngan mga negosyante ha pagpapasweldo agud nga dire ini magresulta ha underemployment o unemployment ha rehiyon.
Nahibaruan nga basar ha panibag-o nga wage order, ha syahan nga tranche in ig iimplementar an P25 increase, 15 kaadlaw mahuman an publication hini ngan an additional nga P25 in igpapatuman naman ha Enero 2, 2023.
