TACLOBAN CITY- Padayon nga guin rereklamo han pira nga trabahante han Department of Pubic Works and Highways an diri pa hingpit nga nakarawat nga Presidential Management Staff (PMS), usa han mga financial assistance ha mga tinaglawas han gobyerno nga nadarahigan han Supertyphoon Yolanda dida han nakalabay nga tuig 2013.
Sumala han usa nga empleyado han DPWH nga waray la magpangaran, nga guindangop na hini an mao nga reklamo pero guinsigngan la ini nga maghulat-hulat mahitungod nga waray pa naghatag hin kamanduan an kauluhan.
Dugang pa hini nga maiha na an mao nga programa kun diin hasta ha pagkayana in waray pa hini mahisabti kun may kaklaruhan pa an mao nga hinabang.
Manunumduman nga naging panawagan han Peoplesurge ha mga biktima han Bagyong Yolanda nga diri undangon an pagpaabot han mga araba ha kauluhan agud la nga matagamtaman an bulig han gobyerno ha luyo nga guinbutangan naman hin budget an kada programa hini.
