TACLOBAN CITY — Personal nga dumangop ha stasyon han Bombo Radyo Tacloban an grupo han mga residente tikang ha magkadurudila-in nga parte han Leyte nga nagin biktima han scam.
Sumala ha nagrereklamo nga diri hira nagdadahum nga hira in mabibiktima han modus labi na nga nagpakilala nga ppastora an suspek nga ginkilala nga hi Evelyn Amamangpang.
Stroya han nabiktima nga hi Rey Abenoja, nga dida han Marso 2016 may usa nga grupo nga pumakadto ha ira barangay ngan daw in nagpakilala nga taga Blessed World Foundation, usa nga Non-Government Organization nga kun diin naghahatag hin bulig pinansyal ha mga nabiktima han bagyo Yolanda.
Pero ugsa makuha an mao nga assistance in kinahanglan anay maging miyembro hira ngan magbayad hin nagkakantidad 350 pesos kumo registration fee.
Storya pa ni Rey Abenoja, nga kinahanglan daw nira nga magbayad hin 5,000 pesos para makapag-abre hin account ha bangko ngan matubo an ira kwarta hin sobra 10,000 pesos ngan kun mas damo pa an ira ma recruit in mas madako pa inin.
Gingamit umano nga modus han mao nga foundation nga tikang ha bank account ni anay Presidente Ferdinand Marcos an kwarta.
Ginsaaran gihap hira hin livelihood programs ngan scholarsjip para ha ira mga anak pero tanan han mga ini in waray katuman ngan tigda nala nga waray na magpaabat ha ira an nagpakilala nga admin coordinator han foundation nga hi Rodney Escasinas ngan Evelyn Amamangpang Reserva.
Maabot naman 5 mil nga mga indibidwal na an nabiktima han duwa.
Ginpapanawagan naman han mga nabiktima nga unta in managot ha batas an mga suspek han mao nga modus.
