NATIONAL NEWS– Ginpaangbit ni Consul Judy Razon han Philippine Embassy in Colombia nga waray pa Pilipino ha nasabi nga nasud an nagpahayag hin interes nga magpa-repatriate.
Ine in ha butnga han tensyo ha nasabi nga nasud mahuman nga maaresto hi Venezuelan President Nicholas Maduro.
Sumala kan Razon, nagpapabilin nga maupay an kabutang hiton mga Pilipino, subay na gihapon ha mga nakolekta nga pamahayag han mga Filipino community ha nasabi nga nasud.
Waray gihapon daw Pinoy nga nag-aaro hin bisan anu nga assistance sugad hiton maidara an mga ine ha talwas nga ligar o magbakwit pakadto ha safe zone o evacuation center.
Ha kaluyo hine, nagpapabilin nga nakabantay an Embahada ha sitwasyon han mga Pilipino, kaupod an regular nga pagpapagawas hin abiso.
Mababaruan nga damo nga mga Pilipino an aadto ha Venezuela, nga nagtratrabaho ha religious sector pero pira ha mga ine in ginkokonsidera kumo seasonal worker samtang, ginpapanginano la gihapon kun mayda nagtratrabaho ha oil industry, usa ha mga pangunahon nga karikuhan han nasabi nga nasud.
Ha pagkayana, mayda sobra 70 nga mga Pinoy an aadto ha Venezuela, subay ine ha datos han embahada.
