TACLOBAN CITY – Ginatos-gatos nga mga Ormocanons ngan mga turista an nagkita ngan tumambong ha gindumara nga Piña Festival Queen Parade and Grand Derby 2022 kaparte han selebrasyon han kapatrunan han Ormoc.
Sumala kan outgoing Ormoc City Mayor ngan Congressman-elect Richard Gomez, an ira pagdumara han mao nga mga aktibidad in nagpapanuyo nga tagan hin kalipayan ngan karisyuhan an mga Ormocanon mahuman an sobra duha katuig nga pagkansela ha mga ini tungod han COVID-19 pandemic.
Dugang pa han mao nga alkalde, ngada pa han bulan han Abril nagtikang an ira pangandaman para hini ngan ginhulat anay nira nga humabubo an COVID-19 cases ha ira syudad.
Walo nga mga contingents an nagpaisan-isan ha mao nga Piña Festival kun diin namayagpag an Western Leyte College of Ormoc Inc. Pundok Kasadpan kumo grand champion han Grand Derby 2022 ngan ginkilala naman kumo Piña Festival Queen 2022 winner hi Princess Donah Ortega Paraiso han STI College of Ormoc.
Mahugot naman nga ginsiguro han Ormoc city government nga nasusunod an mga health protocols kontra COVID-19 ha ira pagdumara han mao nga mga aktibidad.
