ORMOC CITY — Iginpahayag hiton alkalde han Ormoc nga mas magigin engrande an ira pagselebrar han ika-422 katuig nga fiesta ha masunod nga bulan.
Sumala kan Ormoc City Mayor Richard Gomez, nag-alutaga an syudad hin P22 million para han Piña Festival ngan durudilain hini nga mga socio cultural activities.
Dinhe igbibida an durudilain ngan mag-anyag nga mga floats nga ginsubad ha sikat nga karakter han pipira nga libro para han mga bata.
Highlight han Ormoc City 2019 fiesta celebration an Parade of Lights (Hunyo 15), Piña Festival ritual showdown ngan street dance (Hunyo 23), Miss Ormoc (Hunyo 28), ngan culminating concert (Hunyo 29).
10 nga mga eskwelahan an magpapaisan isan ha pagbubuhaton nga Parade of Lights nga may tema nga ‘storyland’.
Ha Piña Festival naman igbibida an de kolores nga street dancing festival kumo pagdayaw han patrona ha syudad ngan han Queen Pineapple nga ginkokonsidera kumo simbolo han Ormoc ngan pinakamatam-is nga pinya ha bug-os nga kalibutan.
Mababaruan nga maabot hin 500 kaektarya hin tuna ha Ormoc in gintatamnan hin pinya ngan maabot hin 100 tonelada an gin-aani tikang hini nga mga plantasyon kada tuig.
Samtang, abre pa liwat an purtahan hadton karuyag nga bumulig han Miss Ormoc 2019 kon diin an magdadaug hini nga pageant an magrerepresentar han syudad ha Miss World beauty pageant.
Pagdudumaraon ini ha Ormoc City Superdome nga may 5,000 seating capacity.
Ha pagbubuhaton liwat nga libre nga concert ha Ormoc City Plaza, makakaupod han mga matambong an banda nga Bamboo.
Labot na hini aabrehan liwat an food bazaar tikang Hunyo 1 kutob Hunyo 30 kon diin igbibida an mga lokal nga produkto nga ginhimo han mga negosyante han syudad.
Nagtutuo naman hi Gomez nga tungod han ira mga pagbubuhaton nga mga aktibidad mas maribhong pa an ira lokal nga turismo.
“We won’t mind spending just to make our people happy (and) one of the reasons why we have this festival is to encourage visitors to come to Ormoc,” an pahayag ni Gomez ha ginbuhat nga press conference.
Subay ha datos han Department of Tourism 8 maabot hin 110,024 an bumisita han syudad han nakalabay nga tuig kon diin umabot hin P1.11 billion an ira kita.
Maabot naman hin 1,200 nga mga pulis, sundalo nga force multipliers an magsisiguro ha seguridad han mga bisita nga matambong han selerasyon han ira fiesta.
