TACLOBAN CITY- Ginpahibaro han Philippine Red Cross Leyte Chapter, na abre an ira buhatan para ha ngatanan nga karuyag magdonate hin dugo ngan sugadman in abre an mao nga ahensya nga maghatag hin kadugangan nga suplay hiton dugo ha usa nga indibidwal nga nagkikinahanglan nga madugtongan an ira kinabuhi pinaagi han pagsusuplay hiton dugo.
Sumala kan Erickson Feliciano Alarcon, Officer Incharge han Philippine Red Cross Leyte Chapter, nga kun han dati in Blood Bank an mao nga buhatan, yana in usa na ine nga Blood Center, ngan nagpapasalamat an ira buhatan nga damo an namagdonar hiton dugo tikang ha magkalain-lain nga Munisipalidad ngan LGU’s.
Naglalaom naman ine nga ugsa nga mahuman an presente nga bulan in damo pa an mag dodonar hiton dugo.
Ginmalatumat naman han mao nga opisyal, nga supresyente an suplay han ira dugo para ha bug-os nga Sinirangan Bisayas.
Mababaruan nga kadam-an nga mga napakadto ha ira opisina, in may mga sakit nga kinahanglan nga tagan hin dugo sugad hiton anemia ngan iba pa nga sakit nga nagkikinahanglan dugangan hin dugo an ira panlawas.
