TACLOBAN CITY – Mahugot nga ginkondena han Philippine Army an natabo nga engkwentro ha butnga han tropa han mga militar ngan mga miyembro han New People’s Army ha parte han Brgy. Dorillo Jipapad, Eastern Samar.
Una hini, nagresulta an mao nga engkwentro ha duha nga patay nga sundalo ngan tulo nga iba pa nga samaran kaupod na an usa nga menor de edad.
Ha gindumara nga press conference kakulop, ginpahayag ni Col. Perfecto Peñaredondo, Commander ng 803rd Infantry Brigade, ira ginkokondena an mao nga insidente nga natabo ha mismo adlaw pa han fiesta o kapatrunan han bungto han Jipapad.
Basar ha inisyal nga report, ala una traynta han umagahon han atakehon han dire pa matudlok nga ihap han mga rebelde nga gintutuuhan tikang haEastern Visayas Regional Party Committee Sub-Guerilla Unit.
Napatay ha mao nga insidente an usa nga staff sergeant ngan private first class samtang an nasamaran naman in usa gihapon nga staff sergeant, private first class ngan usa nga 10 anyos nga bata nga babaye.
An barangay Dorillo kun diin natabo an insidente in makikit-an walo kakilometros tikang ha town proper.
Natabo an insidente harani la ha mismo mga panimalay han mga residente sanglit nga nagresulta naman han pagkadabi han usa nga sibilyan.
Ha pagkayana in padayon an gindudumara nga imbestigasyon ngan operasyon han mga otoridad ha mao nga insidente.
Ini naman an pinakasyahan nga engkwentro nga natabo ha butnga han mga rebelde ngan tropa han gobyerno yana nga tuig ha bug-os nga Eastern Samar.
