TACLOBAN CITY – Gin sigurado han Philippine Health Insurance Corporation (PhilHealth) nga bisan kun waray hira nakarawat nga subsidiya para han presente nga tuig in igpapadayon la gihapon hine an mga programa ngan benepisyo, kun diin pinaagi han Z Benefit Program in padayon nga padadakuon an benepisyo ngan papahaluagan an mga coverage para ha health packages nga ig hahatag han ahensya.
Sumala kan PhilHealth Regional Office 8 Public Relations Officer, Miramar Palacio Zabala, gin tikangan an nasabi nga program dida han tuig-2023 kun diin gin pahaluagan han ahensya an coverage paran PhilHealth dida liwat han tuig-2024, kun diin kaurugan han mga case rates han nasabi nga ahensya in gin pahitas-an hin 30%.
Panuyo han Z Benefits nga umentuhan an suporta han pahabub-an an tikang ha bursa nga bayad, sugadman an pagpapahitaas han financial risk protection ngan pagsigurado han hapsay ngan de-kalidad ngan health services para han mga membro hine.
Gin umentohan naman han ahensya an maabot ha 9,000 nga mga health packages hin 50% para ha tuig-2025 nga nagin epektibo na dida pa han Enero 1, yana nga tuig.
Manunumduman naman nga ugsa mahuman an tuig-2024 in ginmalatumat ni Senate Finance Committee Chairperson Grace Poe nga waray makakarawat an PhilHealth tikang ha 2025 national budget mahitungod nga mayda pa ine P600 billion reserve funds nga pwede pa gamiton.
Samtang, adi naman an mga gin umentuhan hin budget han PhilHealth pinaagi han Z Benefit Program:
- – Breast Cancer, tikang ha P100K yana in nagin P1.4M na
- – Schemic Stroke, tikang ha P28K ngada ha P76K
- – Hemorrhagic Stroke tikang P38K ngada ha P80K
- – High risk pneumonia, tikang ha P32K-P90,100 in ada naman ha 182% an gin hitaas hine
- – Hemodialysis, tikang ha P4K kada session ngada ha P6,350 na kada session, karuyag sidngon, an usa nga hemodialysis patient in mayda na 156 sessions nga coverd han PhilHealth ha usa katuig, kun diin maabot ha P990,600 an pwede makarawat an usa nga pasyente kada tuig.
- – Caesarean operation, tikang ha P24,700 ngada ha P37K
- – Asthma in Acute exacerbation, tikang ha P9K ngada ha P22,488
- – Kidney transplant, tikang ha P600K ngada ha P800K kutob P2.1M
