Nagpahimatngon an Philippine Exporters Confederation Inc. (Philexport) kakulop nga adlaw, Marso 1, nga pwede magdurot hin dako nga epekto ha pankalibutan nga supply chain an nagtitikaduro nga tensyon ha Middle East, kasunod han pag-atake han Estados Unidos ngan Israel ha Iran, ngan an pagbulos han Iran.
Ha usa nga pahayag, ginmalatumat han grupo nga an mga pag-atake ngan pagtarget ha mga nasud ha Middle East nga mayda base militar ha US ngan an pagpapahugot ha Strait of Hormuz in nagdurot hin volatility ha enery markets.
Subay ha grupo, an mas mahinay nga pag-ursa han ekonomiya ngan mas hitaas nga gastos in posible makaapekto ha agos han kalakalan ha bug-os nga kalibutan.
Para ha Pilipinas, nga dako an gin aangkat nga lana, an paghitaas han presyo han krudo in direkta n ga magpapahitas ha gastos ha produksyon, transportasyon, ngan logistics.
Subay naman ha PhilExport, pwede hini pahinayon an ‘price competitiveness’ han mga produkto han Pilipinas ha pankalibutan nga merkado.
Kaupod ha mga sektor nga pinakaapektado in an electronics, garments, processed food, ngan furniture, nga pwede maatubang ha mas hitaas nga shipping rates, insurance premiums, ngan mas hamubo nga transit time kun magbabag-o o madedelatar an mga ruta.
Ginbalikan gihapon han grupo an mga nakalabay nga tensyon ha rehiyon nga nagresulta ha freight ngan security surcharges—mga dugang nga sukot nga pwede utro igpahamtang ngan magpabug-at ha kalakalan ngan turismo.
