Pormal na nga pumirma an Pilipinas ha United Nations Convention against Cybercrime, usa nga pankalibutan nga kasarabutan nga panuyo nga pakusgon an kooperasyon han mga nasud ha pag-ato ha mga krimen ha digital world ngan pagpapadagmit han cross-border sharing han electronic evidence.
Usa gihapon ine nga makasaysayanon nga kasabutan mahitungod nga ginkikilala hine ha syahan nga higayon an non-consensual distribution han intimate images kumo usa nga klase hin cybercrime.
Umatender ha pagpirma hi Department of Information and Communications Technology (DICT) Secretary Henry Aguda, nga tinaglawas han Pilipinas ha convention nga gindumara hadton Oktubre 25-26 ha Ha Noi, Vietnam.
Subay ha DICT, ginpanukala han Pilipinas an mas mahugot nga proteksyon para ha mga kabataan nga nagamit hin internet, pati na gihapon an dugang nga technical assistance para ha mga developing countries. Panuyo hine nga mabalanse an epektibo nga pagpapatuman han balaod ngan an pagrespeto ha katungod-pantawo ha digital space.
Gintagan-duon ha convention an magkaduru-dilain nga aspeto han cyber offenses, pag-papaangbit han electronic evidences, ngan an pagpapadig-on han 24/7 international cooperation mechanism agud mapadagmit an pagbaton ha mga insidente han cybercrime.
Ha mensahe naman ni Presidente Ferdinand Marcos Jr., gintagan-duon hine an determinasyon han Pilipinas nga pakusgon an global cooperation kontra ha cyber threats, samtang ginta-tagan importansya an trust, accountability, ngan human rigthts ha panahon han digital transformation.
Kadungan hine, ginpahinumdom gihapon han DICT nga padayon hine nga papadig-unon an cyber resilience han nasud pinaagi han mga programa sugad han Oplan Cyberdome ngan Oplan Paskong Sigurado, nga nakapukos ha proactive cyber defense ngan pagpapahitas han hibaro ha online scams ngan cybercrimes.
