NATIONAL–Ginpahayag han Capital Economics nga pwede nga dire makuha han Philippine economy an Gross Domestic Product (GDP) target hini kutob ha 2027 matungod ha nagpapadayon nga isyu ha mga anomalya ha flood control projects.
Ginlalaoman nga maabot la ha 4% an pag-umento han GDP yana nga 2025, mas habubo pa ha target han gobyerno nga 5.5-6.5%.
Mas hitaas ine hin guti para ha 4.5% ha 2026 ngan 5% ha 2027, pero magpapabilin nga mas habubo pa ini ha target nga 6-7%.
Ginmalatumat naman ni Gareth Leather han Capital Economics nga an corruption scandal in padayon nga nagpapabug-at ha nasud ha mga masunod nga quarters ngan posible nga mag-trigger pa hin dugang nga rate cuts tikang ha Bangko Sentral ng Pilipinas.
Kadungan hini, ginreport naman han ANZ Research nga an ekonomiya han nasud in ginlalaoman nga mahitaas ha 4.8% yana nga tuig matungod ha pagtitipid han gobyerno ngan mahugot nga imbestigasyon ha mga public infrastructure projects.
Mababaruan naman ha ika-tulo nga kwarter, huminay an pag-umento han ekonomiya ha 4%, pinakamahinay tikang ha COVID 19.
Umubos gihapon an government spending ha P430.6-B han Oktubre, pagubos hin 7.76% tikang han naglabay nga tuig.
Ha kaluyo hini, habubo an inflation projections nga ginlalaoman nga umabot ha 1.6% yana nga tuig ngan mahitaas la ha 2.4% ha 2026, sumala ha Capital Economics.
