TACLOBAN CITY – Padayon an paghinitaas han ihap han sakit nga pertussis nga nahipapatik ha Sinirangan Bisayas.
Sumala kan Jelyn Lopez- Malibago, Information Officer hiton DOH Regional Office Vlll, as of May 25, ada na ha 220 an nahipatik nga kaso han pertussis ha bug-os nga rehiyon kun diin ha nasabi nga ihap in lima an namatay.
Ha kabug-usan nga ihap, 34 han mga ine an kumpirmado nga kaso basar han samples nga iginpadara ha Research Institute for Tropical Medicine (RITM) samtang an 186 nga iba pa in suspected cases.
Kadam-an naman han mga nahipapatik nga kaso in ada ha 1-year-old paubos an edad kun diin 161 o 73% han nasabi nga ihap an waray pa kabakunahi kontra ha Pertussis ngan an probinsya han Leyte an nakaghipatik han pinakahitaas nga ihap han kaso nga umabot ha 114.
Sugadman, 206 han mga ine an nahipatik nga naupay na.
Samtang, kasumpay han sitwasyon ha Pertussis ha rehiyon, gin-aaghat han buhatan han Department of Health an publiko nga padayon nga obserbahan an mga precautionary measures kun magawas o malakat ha panimalay agud makalikay ha nasabi nga sakit.
